Presentación-da-Festa-do-Salmón

A Estrada programa máis dunha vintena de actividades para celebrar a XLI Festa do Salmón

O Concello da Estrada adiantou hoxe durante a presentación da cuadraxésimo primeira Festa do Salmón que a organización programou nesta edición máis dunha vintena de actividades gastronómicas, culturais, deportivas, lúdicas e institucionais coa finalidade de atraer a milleiros de visitantes dende o venres 9 de maio ata o domingo 18 de maio.

A presentación da XLI Festa do Salmón, na que estiveron presentes varios membros do goberno local e representantes do sector da hostalaría, tivo lugar esta mañá na Praza da Constitución da Estrada. Esta praza foi tamén o punto de partida dun autobús de estilo tradicional inglés que percorrerá ata o vindeiro domingo pola tarde preto de 1.000 quilómetros para divulgar a proximidade da Festa do Salmón nas principais cidades e vilas das provincias de Pontevedra e A Coruña.

Aínda que a data central da festa será o domingo 18 de maio, os organizadores e os 24 establecementos do sector de hostalería colaboradores decidiron ampliar as xornadas de degustación de tapas de salmón á fin de semana anterior, de xeito que os días 9, 10, 11, 15, 16 e 17 de maio poderanse degustar as devanditas tapas nun total de 17 locais de hostalaría. Ademais, o domingo 18 a Praza da Constitución acollerá a tradicional degustación popular de salmón, na que repetirán cinco establecementos e á que se sumarán outros sete restaurantes.

O alcalde da Estrada, José López Campos, salientou durante a presentación que a Festa do Salmón, que foi declarada Festa de Interese Turístico de Galicia en 2013, xa é “un dos buques insignia do turismo na Estrada, xunto coa Rapa das Bestas e o Pazo de Oca”. Nembargantes, avogou por reforzar o traballo en tres liñas estratéxicas para darlle un novo pulo: “promover unha maior divulgación fóra da Estrada de todos os atractivos desta festa, buscar un maior vencellamento co medio natural e as orixes na pesca do salmón no río Ulla e promover unha maior oferta de actividades gastronómicas en colaboración cos establecementos da hostalaría”.

Entre os principais atractivos desta cuadraxésimo primeira edición, José López destacou dúas actividades xa convertidas en tradicionais, como son o Concurso Internacional de Pesca do Salmón, que celebrará a súa trixésimo oitava edición os días 10 e 11 de maio nos coutos de Couso, Sinde e Ximonde, e a Ruta do Salmón en BTT, que terá lugar o domingo 18 e que constará dun percorrido de preto de 40 quilómetros.

Bus do salmón

Un autobús de estilo inglés percorrerá esta fin de semana preto de 1.000 quilómetros para promocionar a Festa do Salmón

Un autobús de estilo tradicional inglés, vinilado coa imaxe da XLI Festa do Salmón, percorrerá dende hoxe ata o vindeiro domingo pola tarde preto de 1.000 quilómetros para promocionar a cuadraxésimo primeira edición desta cita gastronómica. O autobús, que comezou o seu itinerario esta mañá tras a presentación do programa de actividades da festa diante do consistorio estradense, ten previsto visitar hoxe as cidades de Pontevedra e Vigo. Na xornada de mañá percorrerá diversos municipios da área do Salnés, como Sanxenxo, O Grove e Cambados, e tamén acudirá a Santiago de Compostela. Na xornada do domingo visitará Padrón e a cidade da Coruña, finalizando o seu percorrido pola noite en Vigo.

XLI-Festa-do-Salmón-Cartel

O cartel da XLI Festa do Salmón, deseñado por Monster Studio

O cartel anunciador da XLI Festa do Salmón da Estrada, así como outros elementos gráficos que se empregarán na divulgación deste evento gastronómico, foron creados polo estudo estradense Monster Studio. Nesta ocasión, o cartel está deseñado a partires dunha fotografía dun salmón sobre unha mesa de corte dun restaurante.

Argentinos Burguer - Potito

Argentinos Burguer gaña o Concurso de Tapas de Salmón co “Potito”

Argentinos Burguer fixo dobrete na segunda edición do Concurso de Tapas de Salmón, xa que gañou coa súa tapa “Potito” e acadou a segunda praza con “Brétemas do Ulla”. En terceiro lugar clasificouse “Crocante de salmón con vinagreta de mel e mostaza”, do Bar Andalucía. Os tres premios, de 300, 200 e 100 euros, respectivamente, entregaranse esta semana nun acto público xunto con diplomas acreditativos aos 17 locais participantes.

En canto aos premios para o público, o estradense Carlos Loureiro, que completou o percorrido por todos os locais, levou 500 euros en vales para gastar nos establecementos de restauración e hostalaría que colaboraron con esta edición da Festa do Salmón. Ademais, tamén se sortearon os tres segundos premios, de 200 euros cada un, tamén en vales, e recaeron en Ana Arca Abalo, Miguel Ángel Castro Fernández e Javier Barreiro Lorenzo.

O alcalde, José López, acompañado dos concelleiros Juan Constenla, Nemesio Rey e Óscar Durán abríu diante dos medios de comunicación as cualificacións do xurado técnico do concurso de tapas do salmón, conformado polos chefs estradenses Javier Rey, Javier Fins e Federico López, para que se sumaran ao voto popular e se coñeceran os gañadores.

José López aposta por desestacionalizar a gastronomía do salmón e reforzar a promoción exterior da festa

O alcalde da Estrada, José López, fixo hoxe un balance da 40ª Festa do Salmón, que celebrou o seu día grande o pasado domingo 19, e amosou a súa satisfacción polo resultado xeral, aínda que xa comezou a pensar na seguinte edición anunciando que os principais retos serán a desestacionalización da gastronomía en torno ao salmón e o impulso á promoción exterior da festa.

López cre que 9.000 asistentes, case 6.000 pinchos servidos na degustación popular e centos de persoas nas actividades paralelas (Photocall, Gala Máxica, Ruta de BTT, Feira de Artesanía, Exposición de Montaxe de Moscas…) confirman a boa saúde da festa, pero subliñou que debe comezar a traballarse de inmediato no futuro desta cita gastronómica aproveitando a recente catalogación de Festa de Galicia de Interese Turístico. “A cita vai ter máis apoios, máis posibilidades de axudas e máis difusión e visibilidade ao entrar no circuíto das cen principais festas de Galicia”, sinalou.

O rexedor local está convencido de que se debe estender o programa de actividades durante máis tempo, sempre en consonancia cos hostaleiros locais, co obxectivo de desestacionalizar a gastronomía en torno ao salmón. Neste senso, a búsqueda de novas actividades e o maior vencellamento aos valores deportivos e medioambientais da pesca e do río Ulla xogarán un papel fundamental “para xerar riqueza e postos de traballo” no sector servizos e de lecer do municipio.

López tamén anunciou a súa aposta pola promoción exterior da Festa do Salmón de cara a vindeiras edicións, inicialmente por toda Galicia, para facer aumentar a cifra de visitantes máis alá dos propios estradenses. Neste contexto, cre que debería abordarse a posible comercialización do campanu e dos salmóns do Ulla como medida promocional tanto do río como da festa gastronómica. Paralelamente, estudiaranse distintas alternativas para multiplicar a imaxe e o grao de coñecemento da festa.

9.000 persoas asisten aos actos da 40ª Festa do Salmón na Estrada

Unhas 9.000 persoas asistiron na xornada de hoxe aos distintos actos programados co gallo da 40ª Festa do Salmón, celebrada na Estrada. O evento saldouse cun bo éxito de público e de espectativas por parte dos hostaleiros e dos restauradores locais, xa que na degustación popular despacháronse máis de 1.900 bandexas de tapas, o que supón uns 5.800 pinchos.

Tras a o arranque da Feira de Artesanía e da Mostra de montaxe de moscas habilitadas na alameda municipal, a atención centrouse no Teatro Principal, onde o médico Ramiro Varela deu lectura ao pregón (adxúntase íntegramente a súa intervención) e onde se procedeu á imposición dos Salmóns de Ouro ao pregoeiro, ao secretario xeral de Política Lingüística, Valentín García, e ao pianista Javier Otero.

O acto, que contou coa presenza do conselleiro de Cultura, Xesús Vázquez, e do director xeral de Conservación da Natureza, Ricardo García-Borregón, serviu ao alcalde estradense, José López, para facer un chamamento á restauración e á hostalaría locais co obxectivo de comezar a traballar de inmediato en accións que favorezan a desestacionalización da gastronomía en torno ao salmón. A intención é xerar riqueza e postos de traballo neste sector, ampliando os meses nos que o salmón é unha referencia gastronómica en Galicia.

Tras desvelar a súa intención de colocar a Festa do Salmón da Estrada no panorama nacional como se merece pola súa importancia actual, José López sinalou a súa intención de traballar para permitir a comercialización do campanu e dos salmóns do Ulla, como se fai noutras partes de España, para seguir engadindo atractivos á festa.

O alcalde, que loubou aos tres galardoados, á sociedade Río Ulla, ao Centro de Iniciativas Turísticas (CIT) e ao conselleiro Xesús Vázquez polo seu pulo para o novo Pérez Viondi, confía en que esta festa, a Rapa das Bestas, o Entroido dos Xenerais do Ulla e o Pazo de Oca se convirtan nos referentes turísticos do concello e permitan ir superando, pouco a pouco, o actual contexto de crise.

Tras os actos institucionais no Teatro Principal, o interese da festa desprazouse ata a carpa instalada na Praza da Constitución, onde o grupo Tequexetéldere e as formacións Nuestra Señora del Rosario (Murcia) e Salleko Dantza Eta Txistu Taldea (País Vasco) animaron a concorrida degustación popular.

Paralelamente, o Photocall do Salmón chamou a atención de máis de 500 estradenses e visitantes, xa que se repartiron máis de 250 portadas conmemorativas da 40ª Festa do Salmón coa fotografía dos participantes.

IMAG0224

A Estrada prevé acoller entre 8.000 e 10.000 persoas na 40ª Festa do Salmón

O Concello da Estrada prevé acoller entre 8.000 e 10.000 persoas mañá domingo nas actividades da cadraséxima edición da Festa do Salmón. Deste xeito, daríase un pequeno impulso á asistencia con respecto a edicións anteriores e poñeríase o primeiro chanzo para incrementar a repercusión desta cita gastronómica de cara ao futuro.

O alcalde estradense, José López, anima aos estradenses e tamén aos veciños dos demais concellos de Galicia a que se acheguen ata a vila para probar as 35 especialidades de salmón que se ofrecerán na degustación popular. O rexedor local agarda que “o tempo acompañe” para pechar con éxito estas semanas de actividades.

Ademais, indicou que o obxectivo do goberno local céntrase en seguir prestixiando a festa e estender as semanas de actividades para desestacionalizar o consumo do salmón. “A gastronomía é unha alternativa interesante para o lecer no actual contexto de crise, polo que cremos que debemos potenciar esta festa e todo o que a rodea para manter e incluso facer medrar as deceas de postos de traballo que hai na hostalaría local, así como favorecer a xeración de riqueza e o impulso da nosa economía”, subliñou, antes de lembrar a ampla oferta dos restaurantes locais que preparan o salmón, con preto de 2.000 prazas diarias e deceas de especialidades.

O rexedor cre que o Concello da Estrada conta cunha importante potencialidade nas áreas do turismo e do lecer grazas a esta festa e o seu vencellamento ao río Ulla, a Rapa das Bestas de Sabucedo e o Entroido dos Xenerais do Ulla. “A estes tres eixos debemos engadir os valores arquitectónicos, como o Pazo de Oca e moitos outros, e os naturais e paisaxísticos para artellar unha estratexia que permita que o municipio obteña rendemento e se poida mellorar a calidade de vida dos estradenses”, destacou.

*Imaxe da conexión en directo do programa A Revista (TVG) feita esta mesma mañá cos hostaleiros do concurso de tapas.

A Estrada repartirá 6.000 pinchos de salmón na degustación popular

O Concello e os restaurantes da Estrada repartirán o vindeiro domingo, 19 de maio, 6.000 pinchos de salmón durante a degustación popular da cadraséxima edición da Festa do Salmón. Os doce establecementos colaboradores servirán 2.000 bandexas de tapas, cada unha delas con tres preparados distintos en torno ao “rei do río”.

Desta volta, a festa conta cunha dúcia de establecementos colaboradores, repartidos entre oito restaurantes (Nixon, O Asador de Leo, Velis Nolis, Os Peares, La Bombilla, Sala Gradín, Don Juan e Samaná ), dúas panaderías (A Fogaza e Cervela), un operador de turismo rural (Mar de Compostela) e un lagar de sidra estradense (Sidra de Ribela). En total, ofertarán 35 especialidades distintas que van dende os pratos máis tradicionais do salmón ata os máis innovadores, incorporando cociñas internacionais e produtos de novo pulo nos mercados.

Co gallo de manter a popularidade da degustación, que acollerá a milleiros de persoas, os prezos de cada bandexa de tapas de salmón seguirán fixados en catro euros.

A Gala Máxica do Salmón e o Photocall, as citas para os máis pequenos

O Concello da Estrada acollerá mañá, sábado 18, a Gala Máxica, unha das principais actividades infantís incluídas no programa da cadraséxima Festa do Salmón. Este espectáculo, protagonizado por cinco magos e caracterizado pola súa variedade e dinamismo, comezará ás 18.00 horas na carpa habilitada na Praza da Constitución da Estrada. Cabe sinalar que o acceso é gratuíto e que se habilitarán asentos para o público.

A Gala Máxica, presentada esta mañá polo concelleiro Juan Constenla, o Mago Vituco e a súa compañeira Jessica Guloomal, está pensada especialmente para os máis pequenos, pero tamén fará as delicias do público adulto.

Actuarán Vituco e Guloomal, así como o Mago Romarís, O Gran Pedrini e o Mago da Boina. A intención deste elenco de magos é facer un espectáculo divertido durante uns 80 minutos cunha gran interacción cos rapaces.

Photocall

Por outra banda, Juan Constenla explicou que a outra gran actividade para os máis pequenos será o Photocall do Salmón, programado para o domingo 19 ás 13.00 horas na alameda municipal, xusto nas inmediacións da carpa da degustación popular.

Os rapaces interesados faranse unha fotografía diante dun fondo relacionado coa Festa do Salmón e levarán un xornal conmemorativo da cita gastronómica coa súa imaxe a modo de recordo.

ganador

O vigués Julio Gallego imponse no Concurso Internacional de Pesca de Salmón

O vigués Julio Gallego Núñez, xubilado de banca de 68 anos e afincado en Cangas, proclamouse vencedor da triséximo sétima edición do Concurso Internacional de Pesca do Salmón, celebrado esta fin de semana nos coutos estradenses de Ximonde, Couso e Sinde. Este deportista capturou na tarde do sábado, no posto de Penedo Redondo do couto de Ximonde, unha peza de 10,19 quilogramos de peso e 97 centímetros de lonxitude.

O salmón, sétimo da presente temporada e o máis grande dos saídos do Ulla neste 2013, foi a única captura do “rei do río” que se rexistrou nas dúas xornadas de competición. Caeu as 17.03 horas cun cebo de miñoca e quisquilla e resistiuse para saír da auga, proceso que se prolongou durante case vinte minutos. Incluso houbo algo de fortuna porque, xusto ao chegar ás beiras do Ulla, soltouse da caña. Trátase dun exemplar salvaxe xa que carece das micromarcas propias dos peixes das repoboacións.

O pescador, moi ledo polo trunfo acadado, é un veterano da captura do salmón nas augas do río estradense, xa que leva 45 anos acudindo a practicar o seu deporte favorito e trinta participando neste campionato internacional. O concurso, organizado pola sociedade Río Ulla, foi un éxito de participación, calidade dos participantes e público.

*Fotografía de Ramiro Aller Porto.

Uso de cookies

Este sitio web utiliza cookies para que vostede teña a mejor experiencia de usuario/a. Se segue a navegar está a dar o seu consentimento para a aceptación das mencionadas cookies e a aceptación da nosa política de cookies.

ACEPTAR
Aviso de cookies