Mil persoas e dous mil pinchos, balance da primeira fin de semana no concurso de tapas

Preto de mil persoas comezaron a participar durante a primeira fin de semana no Concurso de Tapas de Salmón, organizado polo Concello da Estrada en colaboración cos locais de hostalaría co gallo dos actos da cadraséxima edición da Festa do Salmón, que celebrará o seu día grande o vindeiro domingo 19.

As primeiras estimacións apuntan a que os 17 locais participantes serviron máis de 2.000 pinchos durante as tres primeiras xornadas do certame. De feito, algún establecemento rozou as 300 tapas na primeira fin de semana, que rexistrou máis actividade na noite do venres

Os establecementos volverán a servir as súas creacións en torno ao salmón dende o xoves pola tarde, de 20.00 a 23.00 horas. O vernes estarán habilitadas a quenda de mediodía, de 12.00 a 15.00 horas, e a de tarde, de 20.00 a 23.00 horas. Finalmente, o sábado ofreceranse os pratos de 12.00 a 15.00 horas, xa que se procederá ao reconto polo tarde para dar os nomes dos tres gañadores, que serán premiados con 300, 200 e 100 euros, respectivamente..

Os locais participantes son Andalucía, Samaná, O Paseo, Os Peares, La Bombilla, Xantares, Navegación, Valenciaga, Argentinos Burguer, Nicol´s, O Café de Xulia, Boliche, Enredo, Don Juan, Eureka, O Lar e Scala.

Cabe sinalar que a relación das 34 tapas, dous por establecemento, pode consultarse na páxina web da Festa do Salmón, á que se accede a través da dirección www.festadosalmon.com.

A Festa do Salmón 2013 estrea spot televisivo

A 40ª Festa do Salmón, que vivirá o seu día grande o vindeiro domingo 19 de maio na Estrada, estrea esta noite spot publicitario na Televisión de Galicia (TVG). As emisións, que comezarán ás 21.30 horas, prolongaranse ata o vindeiro sábado. O traballo, de 21 segundos, mistura as distintas especialidades de salmón que se poden degustar nos restaurantes e bares do municipio cos valores deportivos e medioambientais da práctica da pesca do salmón nos coutos estradenses do río Ulla.

ALCALDE NAVA Y TAPAS

López destaca a ampla oferta da restauración estradense con 2.000 prazas para a degustación de salmón

O alcalde da Estrada, José López, destacou hoxe, durante a presentación da 40ª Festa do Salmón celebrada no couto de Ximonde, a ampla oferta da restauración e a hostalaría locais, xa que os establecementos colaboradores ofertan 2.000 prazas para a degustación dos centos de variedades que se ofrecen no municipio en torno ao “rei do río”.

O rexedor estivo acompañado durante a presentación pola directora da Axencia Galega de Turismo, Nava Castro, polo presidente da sociedade Río Ulla, Miguel de la Calle, por varios concelleiros do grupo de goberno e pola práctica totalidade dos restauradores e hostaleiros que participan no Concurso de Tapas ou na degustación popular, os dous principais fitos gastronómicos desta festa. Os cociñeiros estradenses prepararon nas beiras do Ulla as tapas que participarán no certame e fixeron as delicias dos presentes.

José López, que agradeceu a presenza de Nava Castro e a súa implicación nos asuntos relacionados coa Estrada –de feito anunciou unha axuda de 26.000 euros para a promoción da Rapa das Bestas–, sinalou a casualidade de que a presentación oficial coincidise coa declaración do Salmón como Festa de Galicia de Interese Turístico, catalogación que foi aprobada hoxe polo Consello da Xunta.

O alcalde subliñou que todos os esforzos en torno a esta festa “oriéntanse a atraer ao maior número de visitantes para dinamizar a economía e a hostalaría nun momento especialmente complexo”. Resaltou a consolidación e calidade da restauración estradense en torno ao salmón e apostou por incrementar os vencellos entre a festa e a gastronomía locais cos valores medioambientais e deportivos do río Ulla e da pesca do salmón.

Finalmente, quixo destacar a importancia do 37º Concurso Internacional de Pesca do Salmón que se celebra nesta fin de semana nos tres coutos estradenses e adiantou a presentación mañá dunha páxina web específica sobre a Festa do Salmón e das correspondentes redes sociais para iniciar unha nova andaina na súa difusión.

“Exquisitez dos nosos ríos”

Pola súa banda, Nava Castro louvou a mistura de “tradición e innovación” dos restauradores estradenses á hora de preparar o salmón, que cualificou como “unha exquisitez dos nosos ríos”. Ademais, sinalou que o couto de Ximonde é un marco idóneo para a presentación da festa, xa que considerouno como “o mellor couto de España”.

Tras destacar o bo ensamblaxe entre o Río Ulla e a festa gastronómica estradense, amosouse convencida de que a cita conseguirá ser, nun futuro, catalogada como de Interese Turístico Nacional.

Dezasete locais da Estrada participarán no Concurso de Tapas do Salmón

Dezasete locais de hostalaría da Estrada participarán na segunda edición do Concurso de Tapas do Salmón, organizado polo Concello da Estrada no marco dos actos da 40ª Festa do Salmón, que celebrará o seu día grande o domingo 19 de maio.

Os establecementos ofertarán dúas variedades de salmón cada un dende mañá venres, 10 de maio, a partires das 20.00 horas. O concurso estenderase o sábado 11, domingo 12, xoves, 16, venres 17 e sábado 18 entre as 12.00 e as 15.00 e dende as 20.00 ata as 23.00 horas agás na última xornada.

Os locais participantes e a súa oferta de tapas son os seguintes:

Andalucía: crocante de salmón con vinagreta de mel e mostaza e montadiño de salmón afumado máis queixo e salsa fría de Oporto.

Samaná: salmorexo de salmón con escuma de ourizos e aroma de eneldo e tosta de pastel de salmón e trigueiros con mahonesa lixeira de ulva ríxida.

O Paseo: afumado de salmón con ourizo e mango e salmón dourado crocante.

Os Peares: tortilla de salmón e brocheta de salmón.

La Bombilla: salmón en escabeche de cítricos e pudin de salmón e hortalizas.

Xantares: ensalada de salmón e gulas e salmón en salsa de mango.

Navegación: salmón en cama e zume de cítricos e salmón bañado en agridoce de mazá.

Valenciaga: lasaña de salmón e gambas e satays de rapé, salmón e langostinos.

Argentinos Burguer: brétemas do Ulla e potito.

Nicol´s: rolliños da Nicol´s e crepe Der Lachs.

O Café de Xulia: crocante de salmón con salsa de pemento e salmón mariñado sobre pan verde.

Boliche: mariñada de salmón e caprichos de salmón.

Enredo: salmón mariñado e timbal de salmón.

Don Juan: chulas de salmón e salmón ao Don Juan.

Eureka: medallóns de salmón con cogumelos e bocadiños de salmón e pemento.

Tapería O Lar: empanada de salmón e gulas e salmón en costra de abelás.

Scala: empanada de salmón e cítricos con salmón.

Cociñeiros de prestixio

Como principal novidade, este ano a cualificación das tapas participantes dividirase entre un xurado técnico, conformado por tres cociñeiros, que decidirá o 60% da nota de cada prato, e o voto popular, que suporá o 40% restante. Os chefs estradenses Javier Rey (Alborada), Javier Fins (Talaso Atlántico) e Federico López (A Quinta da Auga) farán o circuito das tapas no primeiro domingo do concurso. Os locais optan a tres premios, de 300, 200 e 100 euros, respectivamente.

En canto ao público, para os clientes participantes haberá un galardón máximo de 500 euros para o gañador do sorteo de entre todos aqueles que acrediten probar alomenos unha tapa en todos os locais. Ademais, haberá outros tres de 200 euros a sortear entre os que cubran cada unha das tres zonas nas que está dividido o certame. Todos estes galardóns entregaranse en vales de compra para consumir nos locais de hostalaría ou restauración que colaboren coa 40ª Festa do Salmón.

Cabe sinalar que todos os locais inscritos no concurso de tapas contarán na porta cun distintivo corporativo para facilitar a súa identificación por parte dos clientes e terán a disposición do público as cartillas de participación.

O pianista Javier Otero e o lingüista Valentín García, Salmóns de Ouro 2013

O Centro de Iniciativas Turísticas (CIT), promotor da Festa do Salmón xunto ao Concello da Estrada, deu a coñecer que o pianista Javier Otero Neira e o lingüista Valentín García Gómez, actual secretario xeral de Política Lingüística da Xunta de Galicia, serán condecorados este ano co Salmón de Ouro co gallo da cadraséxima edición da cita gastronómica. Os galardóns foron revelados polo presidente do CIT, Luis Reimóndez, xunto a José López Vilariño.

Valentín García, proposto polo Concello, destaca pola súa “vertiente humana e a súa disposición permanente” para axudar a todo o mundo e especialmente en calquer asunto relacionado co municipio estradense.

Pola súa banda, Javier Otero é un dos músicos máis destacados de Galicia pese a súa xuventude e leva o nome do municipio como bandeira a todos os seus concertos. Ademais, é un dos pianistas máis condecorados dos últimos anos.

O médico Ramiro Varela será o pregoeiro da 40 Festa do Salmón

O ciruxán infantil estradense Ramiro Varela Cives será o encargado de dar lectura ao pregón da 40ª Festa do Salmón da Estrada, que se celebrará o vindeiro domingo 19 de maio. O Centro de Iniciativas Turísticas (CIT) revelou a identidade do pregoeiro para unha edición que, pola cifra, admítese que “non é unha máis”.

Ramiro Varela Cives, fillo da mestra de Guimarei popularmente coñecida como Dona Encarna, realizou ao longo da súa traxectoria profesional milleiros de operacións cirúrxicas e consultas, tratando sempre “dun modo especial” aos pacientes da Estrada. O tamén profesor universitario sente “un profundo amor” polo seu municipio natal, o que, engadido ao seu prestixio profesional, o convirten nunha figura idónea para dar lectura ao pregón deste ano especial.

Antonio Souto Martiñeira pesca o “campanu” en Ximonde

O pescador Antonio Souto Martiñeira, da parroquia estradense de Couso, foi o encargado de capturar o “campanu” do río Ulla na presente temporada. O deportista comezou a práctica ás 8.30 horas de onte no couto de Ximonde, en concreto no posto de Poio da Barca, e en apenas trinta minutos fíxose cun espectacular exemplar. O peixe conta cunhas incribles dimensións de 8,3 quilogramos e 93 centímetros de lonxitude e saíu da auga coa axuda do fillo deste xubilado de 67 anos de idade.

Antonio Souto forma parte dunha importante saga de pescadores estradenses de salmón, xa que cómpre lembrar que o seu irmán é un dos únicos catro deportistas que conseguiu gañar en dúas ocasións o Concurso Internacional de Pesca de Salmón organizado pola sociedade Río Ulla.

Uso de cookies

Este sitio web utiliza cookies para que vostede teña a mejor experiencia de usuario/a. Se segue a navegar está a dar o seu consentimento para a aceptación das mencionadas cookies e a aceptación da nosa política de cookies.

ACEPTAR
Aviso de cookies